العرض الهزلي في اخراج الشياطين

ليه بنتفرج علي عظة بيكون فيها اخراج شياطين رغم ان التعليم اللي فيها غير ارثوذكسي ؟؟

1- اخراج الشياطين من ايام الرسل وهي موهبة ملفتة للنظر و تعطي احساس بالفخر ..حتي ان التلاميذ قالوا للمسيح له المجد .. حتي ان الشياطين تخضع لنا باسمك ...فقال لهم افرحوا بالاكثر ان اسمائكم كتبت في ملكوت السموات

2- انت كانسان عادي الشيطان مبهدلك فنفسك تشوف حد بيقهروه و يعذبه و يمسح بيه الارض ...فبترتاح ان الشيطان ده اللي مدوخ الدنيا كلها بتشوفه بيتهزق قدامك فترتاح نفسيا و يكون اللي بيعمل الشو ده قدامك هو البطل بتاعك و اللي نفسك تعمل زيه 

فبيتحول لايقونه بطل مش عاوز تسمع اي تشويه عنه و ممكن تاكل اي حد بيتكلم عليه بطريقه غلط

مش لانك بتحبه ..لكن لانك شايف ان ده اللي قاهر الشيطان و البطل بتاعك

3- لو في قداس و في عظة للكاهن ده و هو بيخرج الشيطان يا تري هتتفرج علي مين ؟؟
مش محتاجة سؤال ؟؟ اكيد هتتفرج علي اخراج الشياطين
طب لو قالوا المسيح بنفسه هيتكلم معاك في قناة كذا يوم كذا ..هتتفرج عليه ولا هتتفرج علي اخراج الشياطين ؟؟؟ اكيد هتشوف المسيح بنفسه ...علي فكره هو هو في القداس بس حضرتك مش بتشوف عينا المسيح

4- البابا كيرلس لو كان موجود كان هيخرج الشياطين بس من غير ما يمسك المريض من بلطجيه و تضرب في المريض و تجرجره علي الارض قدام قاهر الشيطان و يزعق له و يضربه علي وشه

5- الشيطان في بستان الرهبان كان بيخرج بمجرد ذكر اسم المسيح من غير شو ولا عرض هزلي ...الشيطان كان بيتحرق بمجرد رفع القديس يده للصلاة

6- لما حد ارثوذكسي يذكر و يمدح بني هين وهو قس بروتستانتي تعود علي الشو الاعلامي بخلع الجاكيت و رميه علي الناس فتسقط ..او يشاور بيديه علي الناس فتسقط ..و ده امر ملهوش علاقه بالروح القدس من قريب او من بعيد ..ده لو علاقه بالشيطان فقط و اعماله

7- مقدينيوس و هو مهرطق كان بيتحدي الاباء الرهبان بعمل المعجزات ..حتي بعد موته كانت بتظهر خيالات علي قبره و تصنع عجائب وهو مهرطق ..طبعا من عمل الشيطان

8- ليه مصر فقط اللي شعبها مليان شيطان ؟؟؟ لو الموضوع كده فلماذا جاء المسيح اصلا اذا كان الشيطان بتلك القوة في المؤمنين المعمدين ؟؟

تأكد ان من يريد الشفاء فعلا للناس لن يدخلهم في تجربه ظهورهم اعلاميا و فضحهم 

من يريد الشفاء للناس يكفي فقط ان يصلي لاجلهم او يذكر اسم المسيح
من يريد الشفاء للناس لن ينسب لنفسه قوة الشفاء و يشتم و يهاجم ابائه الاساقفة

اقرأوا فقط بستان الرهبان لتجدوا المبدأ العام في الحياة التقوية هو
ان الفضيلة اذا ظهرت سُرقت و نُهبت من المجد الباطل

#مجدي_ناشد